O Proxecto
Sempre hai esas persoas coas que, frecuentemente, tes esa conversa que comeza por “a ver se algún día facemos algo xuntos”. Pois este proxecto veu cumprir o demorado soño de traballar con José Díaz, productor da desaparecida compañía Voadora. El e Iria Azevedo quedaron entusiasmados co “San Pedro. Manual de Instrucións”, a miña primeira creación para Galiza Emocional, e tiveron a idea que finalmente fixo realidade a común arela de traballarmos xuntos.
Os Andares é unha serie de seis viaxes sonoras pola comarca dos Ancares, territorio declarado Reserva da Biosfera, e que atesoura un rico patrimonio material e inmaterial. Neste tipo de formato é preciso coidar, e moito, a interacción cos habitantes, para non colonizar o discurso desde fóra, e a única maneira de facelo é transformar o traballo en aventura.
Durante dous meses mergullámonos na zona, para falar coa xente de seu, auténticos protagonistas da historia. A acollida non puido ser mellor. Abríronnos casas, caixas de recordos e despensas, e deixaron fluír a memoria e a imaxinación sen contención ningunha.
Sobre o material recollido, a dramaturgas Clara Gayo, Avelina Pérez, María Lado, Iria Acevedo, José Díaz e máis eu, desenvolvemos un relato sobre seis enclaves máxicos: Pobra de Navia, Penarrubia, Torés, Castro de Santa María, Os Grobos e Lagoa Maior. Un equipo de artistas de teatro, poetas e músicos deulle forma e xa se pode disfrutar da viaxe con apenas un móbil e uns auriculares.
Arte na alta montaña, puro pracer emocional.
