A Xénese
Esta peza xurdiu na miña mente nunha noite de insomnio creativo, alá polo ano 2018. A situación socio-política na altura era preocupante, no que respecta á liberdade de expresión e a creación artística, pois cada semana había noticia de actos de censura, persecucións xudiciais e escándalos mediáticos contra artistas e creadores de variadas disciplinas, como había tempo non se vía. (Ainda que agora case andamos igual ou pior…)
Esa noite caín na conta de que dous grandes amigos e creadores que admiro, no lapso de menos dun ano, foran denunciados por ofensas aos sentimentos relixiosos, no campo do deseño gráfico, no caso de Alberto Guitián, e no da perfomance cómica, no caso de Carlos Santiago.
A miña idea inicial era servir de director e produtor para xuntar ambos os dous nun espectáculo que reunise o seu talento gráfico e literario ao servizo da sagrada causa da liberdade de expresión. Finalmente acabei participando tamén como actor. É un espectáculo que destripa a historia e o concepto da blasfemia, empregando variadas técnicas como a narración escénica, o teatro de obxectos, o video-documental, a manipulación de marionetas e o humor gráfico.
O resultado? Sinceramente penso que debía ser programado en todos os institutos galegos para proveito das vindeiras xeracións e da súa sólida formación democrática.
